12-18 июнь кунлари Қозоғистоннинг Жамбул шаҳрида спорт устаси А.Р.Шох хотирасига бағишланган бешинчи халқаро мусобақа ўтказилди.

Мусобақада 1999 йилда таваллуд топган футболчилардан иборат саккиз жамоа икки гуруҳга бўлинган ҳолда ғолиблик учун кураш олиб борди. Бош соврин учун Қозоғистон клубларидан ташқари, қўшни Қирғизистон ва Россия, шунингдек Тошкентнинг “Бунёдкор” футбол мактаби тарбияланувчилари ҳам иштирок этишди.

Дилмурод Абдуллаев бош мураббийлигидаги тарбияланувчиларимиз гуруҳ босқичини 1-ўрин билан якунладилар. Мусобақа регламентига кўра,  гуруҳ баҳсларини ғолиб сифатида якунлаган жамоалар финалда куч синашишди. Ҳал қилувчи баҳсда ёш бунёдкорчилар Россиянинг “Урал” клуби билан тенгма-тенг ўйин намойиш этишди. Учрашувнинг асосий вақти 1:1 ҳисобида якунланди. Қўшимча таймларда ҳам ғолиб аниқланмагач пенальтилар сериясига мурожаат этилди. Унда омад екатеринбургликларга кулиб боқди ва “Урал” 8:7 ҳисобида ғалаба қозонди.

Турнир якунига кўра, ташкилотчилар “Бунёдкор-99”нинг икки аъзосига алоҳида совринлар ҳам топширишди. Мусобақанинг энг яхши футболчиси учун аталган соврин Жаҳонгир Абдусаломовга, турнирнинг энг тезкор футболчиси ғолиблиги эса Абдужамол Абдумаликовга насиб этди.

3-ўрин учун баҳс
“Монтажчи” – “Абдиш-Ота” 1:1, пенальтилар бўйича 1:4

Финал
“Бунёдкор” – “Урал” 1:1, пенальтилар бўйича 7:8