"Реал"нинг бирорта ўйинчиси Испания терма жамоасига чақирилмади, "Барселона"дан 6 та ўйинчи бор
Испания терма жамоаси Миллатлар лигасининг ҳал қилувчи ўйинларида "Реал" футболчиларисиз иштирок этади. Аммо Каталониянинг "Барселона" клуби терма жамоага бирданига олти нафар футболчини жўнатмоқда - бу ушбу турнир учун таркибдаги рекорд кўрсаткичдир.
Чақирилганлар орасида Ламин Ямал, Гави, Педри ва Фермин Лопес, шунингдек, Даниэл Ольмо ва Пау Кубарси бор эди. Уларнинг барчаси ҳозирда "Барселона" шарафини ҳимоя қилмоқда.
Қизиғи, ортда қолган мавсумда "Борнмут" шарафини ҳимоя қилган ҳимоячи Дин Хейсен ёзда расман "Реал" сафига бориб қўшилади, аммо у ҳозирча Миллатлар Лигаси қайдномасида йўқ.
5 июнь куни бўлиб ўтадиган Миллатлар лигаси ярим финалида испанлар Франция билан куч синашади. Учрашув ғолиби 8 июнь куни Германия - Португалия жуфтлиги ғолиби билан тўқнаш келади.
