Буюк Британияда 26 май куни автомобиль “Ливерпуль” футбол клуби мухлислари устига ҳайдалди. Оломон жамоанинг Англия Премьер Лигасидаги ғалабасини нишонлаётган эди. Бу ҳақда CNN хабар берди.

Ҳодиса оқибатида 50 га яқин одам турли даражада тан жароҳати олган. Улар орасида 4 нафар бола ҳам бор.

Полиция воқеада гумонланган 53 ёшли британиялик ҳайдовчини қўлга олган. Ҳаммаси бўлиб 27 киши шифохонага етказилган. Уларнинг икки нафари — бир бола ва бир катта ёшли шахс жуда оғир аҳволда.

Мерсисайд ёнғин-қутқарув хизмати бош ўт ўчирувчиси Ник Серлнинг сўзларига кўра, автомобиль остидан тўрт киши — уч нафар катта ёшли ва бир бола чиқариб олинган. Яна 20 киши воқеа жойида енгил жароҳатлар олган. Ҳодиса террорчилик ҳаракати сифатида баҳоланмаган.

“Ливерпулдаги бу воқеа жуда даҳшатли. Барча жабрланганларга ҳамдардлик билдираман. Ушбу ҳодисада тезкор ҳаракат қилгани учун полиция ва фавқулодда хизмат ходимларидан миннатдорман”, — деди Буюк Британия бош вазири Кир Стармер.