"Барселона" ҳужумчи Ламин Ямал билан шартномани 2031 йилгача узайтирди, дея хабар бермоқда клуб матбуот хизмати.
2024/25 йилги мавсумда Ямал барча мусобақаларда 55 та ўйинда майдонга тушиб, 18 та гол урди ва 25 та голли узатмани амалга оширди ҳамда жамоа билан Испания чемпионати, мамлакат кубоги ва Суперкубогида ғолиб чиқди.
"Барса" тарбияланувчиси Ямал 2023 йилнинг 29 апрелида 15 ёшида асосий жамоада дебют қилган. Ўшандан бери у 106 та ўйин ўтказиб, Ла Лига, Кубок ва Суперкубокда энг ёш гол муаллифига айланди.
Футболчининг клуб билан аввалги келишуви 2026 йилнинг ёзида якунига етарди. Transfermarkt портали маълумотларига кўра, 17 ёшли футболчининг нархи 180 миллион еврони ташкил этади.
2024 йилда Ямал Испания терма жамоаси билан биргаликда Европа чемпионлигини қўлга киритди. У терма жамоа сафида 19 та ўйин ўтказиб, 4 та гол урган.
