Таити терма жамоаси бош мураббийи Эдди Этаэта Конфедерациялар кубоги доирасидаги Испания терма жамоасига 0:10 ҳисобида бой берилган имконият ҳақида ўз фикрлари билан ўртоқлашди. Бу ҳақда Goal.com шундай ёзади.

"0:10 ҳисобида ютқазиш жуда оғир, лекин футболчиларим ҳақиқатдан ҳам борларини бериб ўйнашди. Ўз имкониятлари доирасидаги барча ишни қилдилар. Тўғри, қайсидир дақиқаларда биз яхшироқ ҳимояланишимиз керак эди.

Бугун трибуналардаги мухлисларнинг деярли ҳаммаси биз тарафда бўлди. Бу биз учун жуда ва жуда муҳим рол ўйнади. Биз бразилияликларнинг юрагига кириб боришга ҳаракат қилдик. Ўйлайманки, буни қила олдик ҳам.

Ўйинни жавобсиз ўнта тўп фарқи билан бой бердик, лекин маҳаллий мухлислар кўнглидан жой олдик. Бизни қўллаб-қувватлаган барчага ўз миннатдорчилигимни билдирмоқчиман.

Умид қиламанки, ушбу турнирдан сўнг уйга қайтганимизда бизни яхши кутиб олишади", дейди Этаэта.