Мадриднинг "Реал" клуби ҳимоячиси Диего Агуадо фаолиятини Бундеслигада давом эттириши мумкин.

Marca хабарига кўра, Дортмунднинг "Боруссия" клуби 18 ёшли футболчининг трансфери бўйича расмий таклиф юборган. Немис клуби таклиф қилган сумма 6 миллион еврони ташкил этади. Шу билан бирга, "Реал" раҳбарияти ҳали қарор қабул қилишга шошилмаяпти: мадридликлар Агуадони бўлажак клублар ўртасидаги жаҳон чемпионати қайдномасига киритишни режалаштирмоқда ва унинг келажагини турнир тугагандан кейингина муҳокама қилишга тайёр.

Ўтган мавсумда Агуадо асосий ва ёшлар жамоаси сафида 13 та ўйинда майдонга тушиб, битта гол урган. Ҳимоячининг "Реал" билан шартномаси 2029 йилнинг ёзигача амал қилади.