АҚШ терма жамоаси бош мураббийи Маурисио Почеттино "Тоттенхэм"га қайтиши ҳақидаги миш-мишларни рад этди.

"Ўйлашимча, 2019 йилда кетганимдан сўнг, "Тоттенхэм"да бош мураббий лавозими бўш бўлган ҳар сафар мени жамоа билан боғлашган. Рўйхатда менинг исмим пайдо бўлади. Миш-мишлар билан танишдим. Клуб рўйхатида 100 нафар мураббий борлигини кўрдим.

Бу борада ташвишланишга арзимайди, деб ўйлайман. Агар бирор нарса содир бўлса, сиз албатта кўрасиз, лекин биз бу ҳақда гапира олмаймиз, чунки менимча, бугун бу ҳақиқатга тўғри келмайди", - дея Почеттинонинг сўзларини келтиради AP.

Аргентиналик 2014 йилдан 2019 йилгача "Тоттенхэм"ни бошқарган, жамоа билан бирга у Чемпионлар Лигаси финалига қадар етиб борган, унда лондонликлар "Ливерпуль"га ютқазган (0:2).

Шунингдек, Почеттино "Эспаньол," "Саутгемптон," "ПСЖ" ва "Челси" клубларида ҳам бош мураббий сифатида ишлаган.

Мураббийнинг АҚШ терма жамоаси билан шартномаси 2026 йилнинг 31 июлига қадар амал қилади.