AQSH terma jamoasi bosh murabbiyi Maurisio Pochettino "Tottenxem"ga qaytishi haqidagi mish-mishlarni rad etdi.

"O‘ylashimcha, 2019 yilda ketganimdan so‘ng, "Tottenxem"da bosh murabbiy lavozimi bo‘sh bo‘lgan har safar meni jamoa bilan bog‘lashgan. Ro‘yxatda mening ismim paydo bo‘ladi. Mish-mishlar bilan tanishdim. Klub ro‘yxatida 100 nafar murabbiy borligini ko‘rdim.

Bu borada tashvishlanishga arzimaydi, deb o‘ylayman. Agar biror narsa sodir bo‘lsa, siz albatta ko‘rasiz, lekin biz bu haqda gapira olmaymiz, chunki menimcha, bugun bu haqiqatga to‘g‘ri kelmaydi", - deya Pochettinoning so‘zlarini keltiradi AP.

Argentinalik 2014 yildan 2019 yilgacha "Tottenxem"ni boshqargan, jamoa bilan birga u Chempionlar Ligasi finaliga qadar yetib borgan, unda londonliklar "Liverpul"ga yutqazgan (0:2).

Shuningdek, Pochettino "Espanyol," "Sautgempton," "PSJ" va "Chelsi" klublarida ham bosh murabbiy sifatida ishlagan.

Murabbiyning AQSH terma jamoasi bilan shartnomasi 2026 yilning 31 iyuliga qadar amal qiladi.