"Барселона" бош мураббийи Ханс-Дитер Флик энди жамоасида дарвозабон Марк-Андре тер Штегенни кўришни истамаяпти. Mundo Deportivo хабарига кўра, бунга футболчининг Испания чемпионатида "Вильярреал"га қарши ўйиндан кейинги хатти-ҳаракатлари сабаб бўлган.

Қайд этилишича, "сариқ субмарина" билан ўйиндан сўнг тер Штеген сардор сифатида стадионда мухлислар олдида нутқ сўзлаши керак эди. Охир-оқибат, немис ўйин амалиёти камлигига норозилик сифатида буни қилишдан бош тортди. Бу билан тер Штеген нафақат Фликнинг, балки президент Жоан Лапортанинг ҳам жаҳлини чиқарди.

Эслатиб ўтамиз, аввалроқ тер Штегенга Италиянинг "Милан" клуби қизиқиш билдираётгани маълум бўлганди.