"Байер" Флориан Вирц ўрнига Жастин Клюйверт номзодини кўриб чиқмоқда.
Talksport нашри тарқатган хабарга кўра немис клуби "Борнмут" билан боғланиб, ярим ҳимоячининг трансфери ҳақида маълумот сўраган.
"Байер" "Ливерпуль"га ўтишга яқин турган Флориан Виртц ўрнига номзодлар рўйхатини тузмоқда. Эрик тен Хаг Клюйвертни идеал номзод деб ҳисобламоқда.
"Борнмут" нидерландиялик футболчи сотилмаслигини билдирди. Бироқ, клуб хўжайини Билл Фоули муносиб таклиф тушса, футболчиларнинг кетишига тўсқинлик қилмаслигини айтган эди.
Клуб футболчи учун расмий нарх белгиламаган, аммо агар уни сотишга қарор қилса, катта эҳтимол билан бу сумма 2023 йил июнь ойида "Рома"га тўланган 9,6 миллион фунтдан икки баравар кўп бўлади.
Қайд этилишича, Клюйвертнинг 2028 йилгача мўлжалланган шартномасида товон пули белгиланмаган. Ўтган мавсумда 26 ёшли футболчи Премьер-лигада 12та гол урди ва 6та голли узатмани амалга оширди.
