Лондоннинг "Арсенал" клуби ҳужумчи позициясини кучайтириш устида ишлашда давом этмоқда.
"Канонирлар" Виктор Дьёкерешга асосий даъвогар сифатида кўрилаётганди, аммо яқинда маълум бўлишича, улар Лиссабоннинг "Спортинг" клубидан шведни ўз сафига қўшиб олишга шошилмаяпти. Журналист Себастьян Пинто маълумотига кўра, 27 ёшли форвард Лондон грандининг нишонлари қаторида қолмоқда, жамоа бош мураббийи Микель Артета эса "РБ Лейпциг"дан 22 ёшли Беньямин Шешко номзодини маъқул кўрмоқда.
Transfermarkt портали Дьёкерешнинг нархини 75 млн еврога, Шешконинг нархини эса 70 млн еврога баҳолаган.
Маълумотларга қараганда, Дьёкереш фаолиятини "Арсенал"да давом эттирмоқчи. У куни кеча "Манчестер Юнайтед"га рад жавобини берганди.
