"Атлетико" бош мураббийи Диего Симеоне жамоаси "Сиэтл Сауэндерс" устидан (3:1) қозонган ғалабадан сўнг Клублар ўртасидаги Жаҳон чемпионати гуруҳ босқичи доирасида турнир ташкилотчиларига нисбатан эътироз билдирди.

Аргентиналик мутахассис футболчилар ва мураббийлар штаби учун қўшимча ноқулайликлар туғдираётган ҳолат — кийиниш хонасининг майдондан жуда узоқ жойлашганини танқид қилди.

"Биз кийиниш хонасига етиб боргунча ҳакамнинг сўнгги ҳуштагидан тўрт ёки беш дақиқа ўтди. Бу вақт мобайнида биз майдондан то кийиниш хонасигача пиёда юрдик. Бундай ҳолат барча жамоаларда такрорланишини аниқ биламан. Кейин эса мураббийларни кечикиш учун жаримага тортишади. Мен одамлар бу кечикишлар қаердан пайдо бўлаётганини тушуниб етишларини истайман", — деди Симеоне Mundo Deportivo нашрига берган интервьюсида.

Таъкидлаш жоиз, бундай муаммо илгари ҳам қайд этилган — хусусан, 2024 йилда АҚШда бўлиб ўтган Америка Кубогида. Ўшанда Аргентина, Уругвай, Чили ва Венесуэла терма жамоалари бош мураббийлари майдонга ўз вақтида чиқмагани учун жазога тортилган эди.

КОНМЕБОЛ раҳбарияти эса мураббийларнинг шикоятларига қарамай, стадионларнинг меъморий хусусиятлари кечикишлар учун баҳона бўла олмаслигини таъкидлаган.