Тошкентда ФИФА ва ОФК ҳамкорлигида ташкил этилган ВАР ва АВАР бўйича махсус семинар ўз якунига етди. Тадбир саудиялик тажрибали инструктор, ФИФА мутахассиси Али Ал Таифи раҳбарлигида олиб борилди.
Семинар давомида иштирокчиларга ВАР тизимига оид энг сўнгги янгиликлар, халқаро амалиётлар ва ФИФА томонидан тавсия этилган долзарб қоидалар атрофлича тушунтирилди. Унда Суперлига учрашувларида фаолият юритаётган ВАР ва АВАР ҳакамлари қатнашди.
Машғулотлар давомида назарий билимлар билан бир қаторда амалий топшириқлар, видеонализлар ва интерактив муҳокамалар орқали ҳакамларнинг техник ва тактик тайёргарлиги янада мустаҳкамланди.
