МЛС футболчилари уюшмаси 2025 йил май ойи ҳолатига кўра амалдаги шартномалар бўйича футболчиларнинг маошлари ҳақидаги маълумотларни эълон қилди. «Интер Майами» ҳужумчиси Лионель Месси иккинчи йил кетма-кет лиганинг энг кўп маош олувчи футболчисига айланди.

Ҳисоботда футболчиларнинг базавий маоши ҳамда шартнома амал қилган давр учун тўланадиган бонусларини ўз ичига олган йиллик кафолатланган компенсация кўрсатилган. 38 ёшли аргентиналик футболчининг базавий маоши 12 миллион долларни ташкил этади. Барча бонусларни қўшиб ҳисоблаганда, Мессининг йиллик даромади 20,4 миллион долларга етади. У ҳар икки кўрсаткич бўйича МЛСда пешқадам ҳисобланади.

Маоши энг юқори бўлган футболчиларнинг Топ-10 рўйхати қуйидагича:

1. Лионель Месси («Интер Майами») — 20,4 млн доллар;
2. Лоренцо Инсинье («Торонто») — 15,4 млн доллар;
3. Серхио Бускетс («Интер Майами») — 8,8 млн доллар;
4. Мигель Альмирон («Атланта Юнайтед») — 7,9 млн доллар;
5. Ирвин Лосано («Сан-Диего») — 7,6 млн доллар;
6. Федерико Бернардески («Торонто») — 6,3 млн доллар;
7. Эмиль Форсберг («Нью-Йорк Ред Буллз») — 6,03 млн доллар;
8. Жорди Альба («Интер Майами») — 6 млн доллар;
9. Рики Пуч («Лос-Анжелес Гэлакси») — 5,8 млн доллар;
10. Жонатан Бамба («Чикаго Файр») — 5,6 млн доллар.

Эслатиб ўтамиз, Лионель Месси 2023 йилдан бери «Интер Майами» сафида тўп сурмоқда. У ўтган мавсумда жамоа таркибида барча мусобақаларда 20 та ўйинда қатнашиб, 15 та гол ва 6 та голли узатма муаллифига айланди.