"Барселона" президенти Жоан Лапорта, шунингдек, клубнинг собиқ бош мураббийлари Луис Энрике ва Эрнесто Вальверде RFEF ҳакамлар техник қўмитаси собиқ вице-президенти Хосе Негрейрага эҳтимолий ноқонуний тўловлар бўйича иш доирасида гувоҳ сифатида сўроқ қилинади.
Бу ҳақда COPE хабар бермоқда. Манбага кўра, Лапорта ва "блауграна"нинг собиқ мураббийларини чақириш тўғрисидаги қарорни судья Алехандра Хил қабул қилган. Прокуратуранинг фикрича, уларнинг кўрсатмалари клуб ва Негрейра ўртасидаги эҳтимолий алоқалар тафсилотларини аниқлашда муҳим аҳамиятга эга бўлиши мумкин. Мажлис санаси кейинроқ белгиланади.
Аввалроқ иш доирасида "Барселона"нинг собиқ президентлари Сандро Росель ва Жозеп Мария Бартомеу кўрсатма берган, улар аллақачон ишда айбланувчи сифатида иштирок этишмоқда. Терговнинг таъкидлашича, 2001-2018 йиллар оралиғида Негрейра клубдан маслаҳат хизматлари учун 7,5 млн евро атрофида пул олган. Шу билан бирга, 2024 йил май ойида суд порахўрлик бўйича айбловларни вақтинча бекор қилган бўлса-да, тергов давом этмоқда.
