Футбол ўйнашни аллақачон унутиб юборган "Милан" ҳужумчиси Дивок Ориги ҳамон клубни тарк этишга шошилмаяпти.
Бельгиялик футболчи "россонерилар" таркибидан чиқарилди, аммо у катта маош олишда давом этмоқда. Клуб раҳбарияти футболчи билан хайрлашмоқчи, аммо у яна бир йил, яъни шартнома муддати тугашини кутишга ҳақли. Журналист Даниэле Лонгонинг ёзишича, ҳужумчи "Милан" унга келишувнинг қолган йили учун тўланиши керак бўлган барча сумманинг ярми миқдорида товон тўлаган тақдирдагина ёзда шартномани муддатидан олдин бекор қилишни маъқуллайди.
Дивок Ориги ўтган йилнинг апрелидан буён майдонга тушмаяпти - ўшанда у "Ноттингем Форест" сафида ижара асосида сўнгги ўйинини ўтказганди. Апрель ойида "Ливерпуль"нинг собиқ футболчиси 30 ёшга тўлди.
