Futbol o‘ynashni allaqachon unutib yuborgan "Milan" hujumchisi Divok Origi hamon klubni tark etishga shoshilmayapti.
Belgiyalik futbolchi "rossonerilar" tarkibidan chiqarildi, ammo u katta maosh olishda davom etmoqda. Klub rahbariyati futbolchi bilan xayrlashmoqchi, ammo u yana bir yil, ya’ni shartnoma muddati tugashini kutishga haqli. Jurnalist Daniele Longoning yozishicha, hujumchi "Milan" unga kelishuvning qolgan yili uchun to‘lanishi kerak bo‘lgan barcha summaning yarmi miqdorida tovon to‘lagan taqdirdagina yozda shartnomani muddatidan oldin bekor qilishni ma’qullaydi.
Divok Origi o‘tgan yilning aprelidan buyon maydonga tushmayapti - o‘shanda u "Nottingem Forest" safida ijara asosida so‘nggi o‘yinini o‘tkazgandi. Aprel oyida "Liverpul"ning sobiq futbolchisi 30 yoshga to‘ldi.
