"Рома" ҳужумчиси Тэмми Абрахам тез орада жамоасини ўзгартиради. Римликлар 27 ёшли футболчи учун Туркиянинг "Бешиктош" клубидан трансфер таклифини қабул қилди, дея хабар бермоқда инсайдер Фабрицио Романо. Битим қиймати 20 млн еврога баҳоланмоқда. Инглизнинг ўзи ҳам трансферга розилик берган.
Тэмми Абрахамнинг харидига "Зенит" ва "Галатасарой" клублари қизиқиш билдирганди. Ўтган мавсумда форвард "Милан" сафида ижара асосида тўп тепган эди.
Тэмми Абрахам 2021 йилнинг ёзида "Челси"дан 40 миллион евродан кўпроқ маблағ эвазига "Рома"га ўтганди. Transfermarkt портали мутахассисларининг баҳолашича, футболчининг айни дамдаги нархи 15 млн еврони ташкил қилмоқда.
