"Барселона" матбуот хизмати ижтимоий тармоқларда клубнинг икки йилдан ортиқ реконструкция қилинаётган тарихий "Камп Ноу" аренасидан олинган видеони эълон қилди.
Видеодан кўриниб турибдики, қурилиш кранлари ҳамон стадион устида осилиб турганига қарамай, арена ўйинларни қабул қилишга деярли тайёр.
"Стадион жиҳозлаш босқичида", — дейилади видео остидаги изоҳда.
Эслатиб ўтамиз, июнь ойи охирида "кўк-анорранглилар" 2025 йилнинг 10 августида ўз стадионига қайтишини расман эълон қилганди. "Камп Ноу" 2023 йилнинг ёзида реконструкция қилиш учун ёпилганди. Ўтган мавсумда "Барселона" ўз уй учрашувларини "Олимпик Льюис Компани" стадионида ўтказди.
2024/2025 йилги мавсумда каталонияликлар "Реал"ни 4 очкога ортда қолдириб, Испания чемпионига айланишди. "Кўк-анорранглилар" финалда ҳам "қаймоқранглилар"ни мағлуб этиб мамлакат кубоги соҳибига айланишди.
