Мадриднинг "Реал" клуби марказий ҳимоячиси Дин Хёйсен клублар ўртасидаги Жаҳон чемпионати 1/4 финалидан ўрин олган "Боруссия" Дортмундга қарши ўйин охирида майдондан четлатилди.

20 ёшли футболчи "асаларилар" ҳужумчиси Серу Гирассини тўхтата олмади ва натижада ўз жарима майдони ичида фол ишлатишга мажбур бўлди. Ҳакам пенальти белгилади ва испанияликка тўғридан-тўғри қизил карточка кўрсатди. Ўша Гирасси нуқтага яқинлашиб, гол урди, аммо "Боруссия"га бу етмади - "қаймоқранглилар" 3:2 ҳисобида ғалаба қозонди.

Хёйсен "ПСЖ" билан 9 июль куни бўлиб ўтиши режалаштирилган ярим финал учрашувини ўтказиб юборишга мажбур бўлади. Хаби Алонсо КЎЖЧнинг барча бешта ўйинида ёш марказий ҳимоячини майдонга туширди - энди мураббий муҳим ўйинда янги ўйинчи ўрнига ким ўйнашини ҳал қилиши керак бўлади.