Машҳур собиқ футболчи Лотар Маттеуснинг фикрича, "Бавария" Томас Мюллер билан хайрлашишни кечиктириши керак.

Клублар ўртасидаги жаҳон чемпионати чорак финалида "ПСЖ"дан 0:2 ҳисобида учралган мағлубият 35 ёшли фахрийнинг Мюнхендаги сўнгги ўйини бўлди, у эркин агент сифатида кетмоқда. Худди шу ўйинда Жамол Мусиала жиддий жароҳат олди ва тўрт ойдан беш ойгача майдонга туша олмайди.

"Жамолнинг жароҳати мени ҳайратда қолдирди, у эндигина асосий таркибга қайтди. Унга омад тилайман. Менимча, ҳозирги вазиятда "Бавария" Мюллерга олти ойлик шартнома таклиф қилиш ҳақида ўйлаб кўриши керак. Олти ойдан кейин АҚШда мавсум бошланади ва шу вақтгача Томас "Бавария"га ёрдам беришда давом этади", деди собиқ футболчи.

Томас Мюллер ҳали янги клуб борасида бир қарорга келмаган, бироқ ўзи ҳам тан олганидек, у МЛСда ўзини синаб кўришга тайёр.