"Челси" бош мураббийи Энцо Мареска клублар ўртасидаги жаҳон чемпионати ярим финалидан ўрин олган Бразилиянинг "Флуминенсе" клубига қарши ўйин олдидан журналистларнинг саволларига жавоб қайтарди.

Жамоалар бугун, Тошкент вақти билан 00:00 да финал йўлланмаси учун майдонга чиқади.

"Бизнинг ёшлигимизни ("Флуминенсе" тажрибаси билан солиштирганда) ҳам афзаллик, ҳам камчилик деб ҳисоблаш мумкин. Ҳаммаси аниқ шароитларга боғлиқ. Тахминимча, бизда клублар ўртасидаги жаҳон чемпионатининг барча иштирокчилари орасида ёшлик бўйича биринчи ёки иккинчи таркиб бор. Ярим финалда бизни жиддий синов кутмоқда," - деди Мареска матбуот анжуманида.

"Челси" - "Флуминенсе" қарама-қаршилиги ғолиби финалда Мадриднинг "Реал" ёки Парижнинг "ПСЖ" жамоаларига қарши майдонга тушади. Ҳал қилувчи учрашув 13 июль куни бўлиб ўтади.