Лондоннинг "Челси" клуби клублар ўртасидаги жаҳон чемпионати ярим финалида "Флуминенсе"ни мағлуб этди (2:0). Шу тариқа, соврин учун курашда фақат Европа вакиллари қолди - "Флуминенсе" Европадан бошқа конфедерациянинг сўнгги жамоаси эди.
Чоршанба куни бўлиб ўтадиган иккинчи ярим финалда "ПСЖ" ва Мадриднинг "Реал" клублари ўзаро тўқнаш келади. Франция ва Испания грандлари ўртасидаги қарама-қаршилик ғолиби 13 июль, якшанба куни "Челси" билан кубок учун баҳс олиб боради.
Ярим финал ўйинлари олдидан "ПСЖ" турнир фаворити, "Флуминенсе" эса муваффақиятга эришиш эҳтимоли энг паст бўлган асосий аутсайдер деб топилганди.
