Мадриднинг "Реал" клуби марказий ҳимоячиси Эдер Милитао хочсимон боғлами узилганидан сўнг майдонга қайтиши ҳақида гапирди.

Чоршанба куни бразилиялик футболчи ўтган йилнинг ноябрь ойидан бери илк бор майдонга тушди. 27 ёшли футболчи клублар ўртасидаги жаҳон чемпионатининг 1/2 финалидан ўрин олган "ПСЖ"га қарши ўйиннинг 64-дақиқасида захирадан майдонга тушди, аммо бу вақтда "қаймоқранглилар" 0:3 ҳисобида ютқазаётган эди.

"Ўзимни яхши ҳис қиляпман, майдонга тушиб, жамоадошларимга ёрдам бериш имкониятидан хурсандман. Жуда оғир дамлар ортда қолди, мен хочсимон боғламнинг навбатдаги ёрилишини бошдан кечирдим, бу осон бўлмади, лекин мен кўп меҳнат қилдим ва қатъиятлилик кўрсатдим. Ҳар қандай спортчи учун ўта оғир жароҳат," - дея Милитаонинг сўзларини келтиради Madrid Universal.