Бир ҳафталик танаффусдан сўнг “Шўртан-Леди” қизлари яна жамоанинг Қаршидаги базасида тўпланишди. Хабар бериб ўтганимиздек, Гўзал Мухутдинова ва Одил Аҳмедов шогирдлари Ўзбекистон Кубогининг кейинги босқичига йўл ола билишмади, шу боис бундан кейинги эътибор фақат чемпионат ўйинларига қаратилади.

Эслатиб ўтамиз, аёллар футболи бўйича Ўзбекистон чемпионатининг иккинчи босқичи 3 августдан старт олади. “Шўртан-Леди” дастлабки уч учрашувни сафарда ўтказади. Яъни, 3 август куни “Қизилқум”, 11 августда “Севинч” ва 14 августда “Машъал” меҳмони бўламиз.

Чемпионатнинг қолган ўйинларига тайёргарлик қандай кетаётгани борасида Гўзал Мухутдинова шундай деди: “26 июнь куни йиғилдик. Аблякимова Ильвина билан Ҳақбердиева Гулсара даволанишаётгани боис ҳозирча келишмади. Менимча, Ильвина сентаябрь-октябрь ойларида майдонга қайтса керак. Гулсара эса августда бизга ёрдам бериши мумкин.

1, 2, 3 июль кунлари Қаршидаги қумли майдонда пляж футболи бўйича Ўзбекистон Кубоги баҳслари бўлиб ўтади. Ҳозирча шу мусобақада иштирок этмоқчимиз. Кубок ўйинларида биздан ташқари “Севинч” билан “Машъал”нинг ҳам қатнашиши маълум бўлди".