Ўзбекистон U-20 ёшлар терма жамоаси ҳимоячиси Максимилиан Фомин Уругвайга қарши U-20 ЖЧ-2013 гуруҳ босқичи 3-тур учрашувида майдонга туша олмайди.

Ўзбекистон U-20 ёшлар терма жамоаси футболчилари U-20 ЖЧ-2013 гуруҳ босқичи дастлабки икки ўйинида ҳакамлар томонидан жами тўрт марта сариқ карточка билан огоҳлантирилди.

Жумладан, Янги Зеландияга қарши 1-тур учрашувида фақатгина Максимилиан Фомин қўполлиги учун сариқ карточка билан жазоланган бўлса, Хорватияга қарши иккинчи ўйинда ҳимоячилар – Сардор Раҳмонов ва Тоҳиржон Шамшитдинов, шунингдек, яна бир марта Максимилиан Фомин огоҳлантирилди.

Максимилиан Фоминнинг сариқ карточкалари иккитага етгани муносабати билан, Ўзбекистон ёшлар терма жамоасининг чап қанот ҳимоячиси Уругвайга қарши ўйинда майдонга туша олмайди. Агар, Уругвайга қарши ўйин давомида Тоҳиржон Шамшитдинов ва Сардор Раҳмонов ҳакам томонидан огоҳлантириладиган бўлса, у ҳолда, ушбу футболчилар терма жамоанинг ЖЧ-2013 доирасидаги кейинги ўйинини ўтказиб юборишга мажбур бўлишади.

Қайд этиш жоиз, Уругвайга қарши ўйин олдидан Ўзбекистон ёшлар терма жамоаси таркибида бошқа ҳеч қандай йўқотишлар, хусусан, жароҳатланган футболчилар йўқ. Терма жамоанинг 27 июнь, пайшанба куни Анталиядаги «Titanic Hotels» меҳмонхоналар тармоғига тегишли Меҳмет Айгун футбол академиясида бўлиб ўтган машғулотлари чоғида барча футболчилар кўтаринки кайфиятда иштирок этишди.