"Локомотив" - "Олмалиқ" ўйинидан кейинги матбуот анжуманининг иккинчи қисмида мезбонлар бош мураббийи Ҳаким Фузайлов иштирок этди.

— Оғир ўйин бўлди. "Олмалиқ" мусобақа фаворитларини мағлубиятга учратишганидан хабарим бор. Ўйиннинг боришини назорат қилдик, кўплаб вазиятлар яратдик. Аммо якуний паллада оқсадик.

— Нима учун жамоа биринчи бўлимда яхши ўйин кўрсата олмади. Бунинг сабаби нимада?
— Йигитлар биринчи давра охирига келиб бироз чарчашди. Йигитлар терма жамоа сафида ўйин ўтказишди, "Қизилқум" билан сафарда Кубок баҳсида майдонга тушишди. Зарафшондаги ўйин иссиқ об-ҳаво шароитида ўтди. Тикланиш учун ихтиёримизда кўп вақт бўлмади. Шу боис, биринчи бўлимда ўйинимиз яхши чиқмади.

— Иван Нагаевнинг ўйинига қандай баҳо берасиз? У кўплаб вазиятлардан фойдалана олмади.
— Энг асосийси вазиятлар бор. Унга бироз маҳорат етишмаяпти. Нагаевда футболчи учун муҳим бўлган тезлик бор. У ҳали ўз устида ишлаши керак. Мен уни истиқболли футболчи деб ҳисоблайман.

— 30 июнь куни бўлиб ўтадиган "Пахтакор" ва "Бунёдкор" ўртасидаги Тошкент дербисида қандай натижа кутяпсиз?
— Билмадим. Ҳар иккала ҳозир пешқадамлар сафида боришмоқда. Ушбу учрашувда қандай натижа қайд этилишининг менга фарқи йўқ. Барибир улар билан ўзаро ўйинлар ўтказамиз. Шунда кўп нарса ҳал бўлади.