"Барселона"нинг янги аъзоси Маркус Рэшфорд Испания ва Англия чемпионатлари ўртасидаги фарқлар ҳақидаги саволга жавоб берди.

27 ёшли футболчи фаолиятида илк бор хориж чемпионатида ўйнайди. Каталония гранди вингерни кейинчалик сотиб олиш имконияти билан "Манчестер Юнайтед"дан ижарага олди.

"Ла Лига даражаси АПЛ билан солиштирганда қандай? Ҳозирча айта олмайман, чунки ҳали "Барселона"да дебют қилмадим. Еврокубокларда Испания жамоаларига қарши ўйинларга асосланиб, шундай хулосага келдимки, Ла Лигада футбол жуда техник, бу ерда тўпга эгалик қилишни яхши кўришади, бундан завқланишади. Ҳозирча нимага дуч келишимни аниқ билмайман, аммо буни уддалай олишимга ишонаман," - деди Рэшфорд "Барса"га ўтганидан кейин берган интервьюсида.

Англиялик футболчи "Манчестер Юнайтед" сафида 426 та ўйинда майдонга тушиб, 138 та гол ва 77 та голли узатмага муаллифлик қилган.