"Тоттенхэм Ҳотспур" Морган Гиббс-Уайт билан можаро ортидан "Ноттингем Форест" билан трансфер бозоридаги келишувларни блоклашга қарор қилди. Лондон клуби футболчи учун 60 миллион фунт стерлинг таклиф қилиб, шартномадаги товон пулини фаоллаштирган деб ўйлади, аммо "Ноттингем" "шпорлар" товон пули ҳақидаги маълумотни ноқонуний олганини даъво қилди ва суд жараёни билан таҳдид қилди. Натижада, 25 ёшли ярим ҳимоячи клуб билан янги 3 йиллик шартнома имзолади ва бу ёзда унинг трансфер имкониятини бутунлай ёпади.
"Эвертон"нинг собиқ бош директори, ҳозирда элита клубларга маслаҳатчилик қилаётган Кит Уайнеснинг айтишича, "Тоттенхэм" "ўрмончилар"дан трансферлар соҳасида қасос олиши мумкин. Унинг маълум қилишича, "Тоттенхэм" "Ноттингем Форест" қизиқиш билдираётган Жейкоб Рэмсини "Астон Вилла"дан сотиб олмоқчи.
