"Наполи" ҳужумчиси Виктор Осимхен тез орада "Галатасарой"нинг янги аъзоси сифатида таништирилади.

Туркия клуби нигериялик футболчини сотиб олиш шартларини келишиб олди. Журналист Николо Скиранинг маълум қилишича, дам олиш кунлари 26 ёшли футболчи трансферни якунлаш учун Истанбулга келади. "Галатасарой" аллақачон турк футболи тарихидаги энг қимматбаҳо трансфер ҳақида эълон тайёрламоқда.

Эслатиб ўтамиз, Виктор Осимхеннинг умумий трансфер нархи 75 млн еврони ташкил этади. Ўтган мавсумда ижара асосида Истанбул клуби шарафини ҳимоя қилган форвард 41 ўйинда 37 та гол ва 8 та голли узатмага муаллифлик қилиб, жамоанинг Туркия чемпионати ва кубогида ғолиб чиқишига ёрдам берган.