Бугун "Интер" ва "Аталанта" клублари ўртасида ҳужумчи Адемола Лукман трансфери бўйича янги музокаралар бўлиб ўтади.

Бўлажак муҳокамалар ҳал қилувчи бўлиши кутилмоқда. Инсайдер Паскуале Гарро маълумотига кўра, миланликлар бергамоликларга 44-45 млн евролик яхшиланган таклиф ва бонусларни тақдим этади. Аввалроқ ўз юлдузи учун 50 млн евро сўраган "Аталанта"га бундай шартлар маъқул келиши ҳозирча номаълум.

Адемола Лукманнинг ўзи аллақачон "Интер"га ўтишга қарор қилган ва клублар унинг трансфер тафсилотларини келишиб олишларига умид қилмоқда. 27 ёшли футболчининг ҳисобида бергамоликлар сафида 118 та ўйинда 52 та гол ва 25 та голли узатма бор.