"Барселона"нинг "Камп Ноу"га қайтиши кечиктирилди ва яқинда клуб Жоан Гампер кубоги доирасида "Комо"га қарши ўйин "Йохан Кройфф" стадионида ўтказилишини эълон қилди. Гап шундаки, Каталония клуби Барселона шаҳар кенгашидан стадионига қайтиш учун керакли рухсатномани олмаган.
Catalunya Радио хабарига кўра, "Барселона" ҳозирда мавсумнинг илк уй учрашувини қаерда ўтказиш ҳақида ўйламоқда. 13 ёки 14 сентябрь куни Ханс-Дитер Флик жамоаси Ла Лигада "Валенсия"ни қабул қилиши керак. Бу ўйин ҳам бор-йўғи 6 минг томошабинга мўлжалланган "Йохан Кройфф" аренасида бўлиб ўтиши эҳтимолдан холи эмас.
"Барселона" ҳозирча "Валенсия"га қарши ўйин учун керакли рухсат олинишига ва учрашув "Камп Ноу"да ўтказилишига умид қилмоқда.
Айтганча, "Барселона" "Монжуик"да "Валенсия" билан ўйнай олмайди, чунки стадионда концерт режалаштирилган. Айнан "Монжуик"да каталонияликлар ўтган мавсумда ўз уй ўйинларини ўтказган эди.
