"Barselona"ning "Kamp Nou"ga qaytishi kechiktirildi va yaqinda klub Joan Gamper kubogi doirasida "Komo"ga qarshi o‘yin "Yoxan Kroyff" stadionida o‘tkazilishini e’lon qildi. Gap shundaki, Kataloniya klubi Barselona shahar kengashidan stadioniga qaytish uchun kerakli ruxsatnomani olmagan.
Catalunya Radio xabariga ko‘ra, "Barselona" hozirda mavsumning ilk uy uchrashuvini qayerda o‘tkazish haqida o‘ylamoqda. 13 yoki 14 sentyabr kuni Xans-Diter Flik jamoasi La Ligada "Valensiya"ni qabul qilishi kerak. Bu o‘yin ham bor-yo‘g‘i 6 ming tomoshabinga mo‘ljallangan "Yoxan Kroyff" arenasida bo‘lib o‘tishi ehtimoldan xoli emas.
"Barselona" hozircha "Valensiya"ga qarshi o‘yin uchun kerakli ruxsat olinishiga va uchrashuv "Kamp Nou"da o‘tkazilishiga umid qilmoqda.
Aytgancha, "Barselona" "Monjuik"da "Valensiya" bilan o‘ynay olmaydi, chunki stadionda konsert rejalashtirilgan. Aynan "Monjuik"da kataloniyaliklar o‘tgan mavsumda o‘z uy o‘yinlarini o‘tkazgan edi.













