"Барселона" Марк-Андре тер Штеген ўрнига янги футболчини рўйхатдан ўтказишга умид қилмоқда.
Кеча немис дарвозабони Бордода белидан операция қилинди. Хабарларга кўра, операциядан сўнг дарҳол тайёрланган дастлабки ҳисоботда жарроҳ Амели Леглисе футболчининг тахминан тўрт ойга сафдан чиқишини тасдиқлаган.
"Барса" Ла Лига тиббий қўмитасига тақдим этадиган ҳужжатда худди шу муддат кўрсатилади. Агар у тасдиқланса, каталонияликлар янги футболчини унга Тер Штеген маошининг 80 фоизини тўлаш имконияти билан рўйхатдан ўтказиш ҳуқуқига эга бўлади.
"Барселона"да керакли ҳужжатларни топшириш учун кўпи билан 30 кун бор, аммо клуб буни кейинги ҳафтадан кечиктирмасдан амалга ошириш ниятида. Тер Штегеннинг аҳволи бўйича уч шифокордан иборат комиссия қарор қабул қилади.
Яна бир шифокор Хорди Ардевола бу иш бўйича масъул экспертлар ҳайъатидан чиқарилди, чунки у беш йил давомида "Барселона"нинг тиббий хизматларини бошқарган.
