Бразилияда якунланган Конфедерациялар кубоги шахсий совринлари ҳам ўз эгаларига топширилди.

Бразилия терма жамоаси ҳужумчиси Неймар финал учрашувининг энг яхши ўйинчиси деб топилди. Ушбу ўйинда у жамоасининг иккинчи голига муаллифлик қилди. Айтиш жоиз, Неймар Бразилия терма жамоаси сафида ўзининг илк совринини қўлга киритди.

Учинчи ўрин учун кечган баҳснинг энг яхши ўйинчи Уругвай терма жамоаси ҳужумчиси Эдисон Кавани деб топилди.

Турнирнинг "Олтин бутса" соҳиби энг кўп гол урган Торресга топширилди. Испания терма жамоаси ҳужумчиси мусобақа давомида бешта гол киритди. Эътиборлиси, улардан тўрттаси Таити дарвозасига урилганди.

Шунингдек, "кумуш бутса" Бразилия термаси аъзоси Фредга, "бронза бутса" эса унинг жамоадоши Неймарга топширилди. Ҳар иккала футболчи ҳисобида тўрттадан гол бор.

Энди Конфедерациялар кубоги - 2013 энг яхши ўйинчисига келсак, ёш Неймар ҳамма рақибларини ортда қолдирди. У турнирда 4та гол урди ва 2та голли узатмани амалга оширди. Япония, Мексика, Италия ва Испанияга қарши ўйинларда энг яхши деб топилди.

"Кумуш тўп" соҳиби Испания яримҳимоячиси Андрес Иньеста бўлса, "бронза тўп" эса мезбонлар вакили Паулиньога насиб этди.

Мусобақа энг яхши дарвозабони дея Бразилия терма жамоаси дарвозабони Жулио Сезар эътироф этилди ва унга "олтин қўлқоп" топширилди.

Шу тариқа ойнинг сўнгги кунида Конфедерациялар кубогига якун ясалди.