Хорватиялик собиқ футболчи Иван Ракитич "Ювентус" мухлисларидан узр сўради. Таниқли собиқ хавбек ижтимоий тармоқларда дўсти Лука Модрич билан тушган суратини эълон қилиб, уни "Милан"га ўтгани билан табриклади. Постга Ракитич "Бьянконерилар" мухлисларини ҳақорат қилувчи сўзни ҳам ёзган эди. Хорватиялик матн мазмунидан хабар топгач, постни ўзгартирди ва кейин узр сўради.
"Ювентус" мухлисларидан чин дилдан узр сўрамоқчиман. Ниятим Лукани "Милан"га ўтгани билан табриклаш эди, тарихий контекст ва сўзларнинг моҳиятидан бехабар эдим. Мен ўзим чуқур ҳурмат қиладиган клубни асло ҳақорат қилмоқчи эмасдим," - дея ёзда фаолиятини якунлаган Ракитичнинг сўзларини келтиради Football Italia.
Лука Модрич эркин агент сифатида "Милан"га ўтди. У Италияга кўчиб ўтгунга қадар 13 йил давомида Мадриднинг "Реал" клубида тўп сурган.
