"Барселона" президенти Жоан Лапорта дарвозабон Марк-Андре тер Штегендан жуда норози.

Эслатиб ўтамиз, германиялик футболчи клубга маошининг бир қисмини бошқа футболчини рўйхатдан ўтказиш учун ишлатиш имконини берадиган узоқ муддатли жароҳат тўғрисидаги тиббий хулосани имзолашдан бош тортди. Яқин соатлар ичида дарвозабон сардорлик боғичидан маҳрум бўлиши мумкин. Аввалроқ, бу борада қарорни мураббий Ханс-Дитер Флик қабул қилиши ҳақида хабарлар тарқалган эди, бироқ журналист Алекс Пинтанелнинг маълум қилишича, клуб раҳбарияти бу масалани ўз зиммасига олмоқчи.

Қайд этилишича, Жоан Лапорта ҳужжатни имзолашдан бош тортгани учун тер Штегендан жуда ғазабланган. Маълум бўлишича, 33 ёшли футболчининг сардорлик мақомини сақлаб қолиш учун деярли имконияти йўқ.