Лондоннинг "Арсенал" клуби устози Микель Артета жамоанинг янги аъзоси Виктор Дьёкерешнинг мавсумолди учрашувларидаги ўйини ҳақида фикр билдирди. Сўнгги ўртоқлик ўйинида "канонирлар" Испаниянинг "Вильярреал" жамоасига 2:3 ҳисобида имкониятни бой берди.
"Виктор 100 фоиз, балки ундан ҳам кўпроқ тайёр бўлади. Дьёкереш ўз кучига жуда ишонади, у тезда муваффақиятга эриша олади. Шу ҳафта ичида унинг кайфиятини кўрдим," - дея изоҳ берди испаниялик мутахассис ОАВ вакиллари билан мулоқот чоғида.
Эслатиб ўтамиз, скандинавиялик голеадор шу ёзда Португалиянинг "Спортинг" клубидан Англия топ-клуби сафига келиб қўшилган эди. Швециялик футболчи "канонирлар" билан 5 йиллик меҳнат шартномасини имзолаган.
