Греция ёшлар терма жамоаси илк маротаба Жаҳон чемпионатида иштирок этаётгани учун бўлса керак, ушбу мамлакат матбуотида Туркиядаги мусобақага қизиқиш юқори. Юнон сайтларида турли интервьюлар, таҳлилий материаллар эълон қилинмоқда. Журналистлардан бири Ўзбекистон гуруҳнинг 3-турида атайлаб Уругвайга ютқазиб, Греция билан ўйнашни мақсад қилгани ҳақидаги тахминни илгари сурди.

"Греция ёшлари илк марта ЖЧда иштирок этаётганларига қарамай, Туркиядаги мусобақада тажрибасизлик яхши натижа кўрсатиш учун асос бўлмаслигини исботлашди. Костас Цанас шогирдлари Мексика устидан ғалаба қозониб, кейинчалик Мали ва Парагвай билан дуранг ўйнаб, дебют мусобақада яхши таассурот қолдиришмоқда. Энди эса қийин давр бошланмоқда. Хато қилган ва мағлубиятга учраган жамоа уйга қайтади. Албатта, "оқ-кўклар" нимчорак финалда Ўзбекистонга қарши ўйнаётгани бизга кичик оптимизм руҳиятини беради. Лекин Ўзбекистон гуруҳнинг сўнгги тури олдидан 1/8 финалда рақиб танлаш имкониятига эга эди. Улар тажрибали рақиблардан қочиб, Грецияни танлаган бўлишлари мумкин. Осиёликлар тўғри йўл танлашдими ёки йўқми, буни сешанба оқшомида билиб оламиз".