"Ньюкасл" мудофаа чизиғини кучайтириш бўйича ишларни давом эттирмоқда. Нуфузли инсайдер Фабрицио Романонинг ижтимоий тармоқларда ёзишича, Англия Премьер-лигаси клуби "Милан" ҳимоячиси Малик Тиав бўйича таклифни яхшилаган.

Аввалроқ, 24 ёшли Тиав "Ньюкасл" билан шахсий шартнома шартларини келишиб олган эди. "Милан" бош мураббийи Массимилиано Аллегри футболчини ўз сафида олиб қолмоқчи эди, аммо энди Англиядан яхшиланган таклиф келиб тушди.

Нуфузли Transfermarkt портали мутахассислари Малик Тиавни 18 миллион еврога баҳоламоқда.

2025/2026 йилги мавсумда "Ньюкасл" Чемпионлар лигасида иштирок этади. "Милан" жорий мавсумда еврокубокларда иштирок этмайди.