"ПСЖ" бош мураббийи Луис Энрике жамоани навбатдаги муваффақиятга етаклади. Франция гранди "Тоттенхэм" билан ўйинда мағлубиятга яқин эди, аммо 85 ва 94-дақиқаларда гол уриб (2:2) мувозанатни тиклади ва пенальтилар сериясида аниқроқ ҳаракат қилди (4:3).
Шу тариқа, Squawka хабарига кўра, Энрике икки ёки ундан ортиқ жамоа билан УЕФА Суперкубогини қўлга киритган бешинчи мураббийга айланди. Илгари буни фақат Карло Анчелотти, Хосеп Гвардиола, Луи ван Гал ва сэр Алекс Фергюсон уддалаган.
Эслатиб ўтамиз, Луис Энрикенинг УЕФА Суперкубогидаги илк ғалабаси 2015 йилга тўғри келади. Ўшанда "Барселона" қўшимча бўлимлардан сўнг "Севилья"ни 5:4 ҳисобида мағлуб этганди.
