"Интер Майами" бош мураббийи Хавьер Маскерано жамоа ҳужумчиси Лионель Месси жароҳатидан тикланиб, МЛСнинг 27-туридан ўрин олган "Лос-Анжелес"га қарши ўйинда майдонга тушиши мумкинлигини айтди.
38 ёшли аргентиналик футболчи 3 август куни Лигалар кубоги доирасида "Некакса"га қарши ўйинда (3:2) мушакларидан жароҳат олди ва жамоанинг икки ўйинини ўтказиб юборди.
"Леонинг аҳволи яхши. Аслида у чоршанба кунидан бери жамоа билан машғулот ўтказмоқда. Агар кутилмаган ҳодиса юз бермаса, у ўйин учун таркибда бўлади," - дея Маскеранонинг сўзларини келтиради ESPN.
"Интер Майами" ва "Лос-Анжелес" жамоалари ўртасидаги баҳс 16 августдан 17 августга ўтар кечаси бўлиб ўтади. Бошланиши - Тошкент вақти билан соат 04:30 да.
