ОЧЛ 2 гуруҳ босқичига қуръа ташланганидан сўнг "Андижон"нинг гуруҳдаги рақибларининг бу борадаги фикрларини билиш ҳам қизиқ эди.

Шу мақсадда «Андижон» матбуот хизмати Баҳрайннинг “Ал-Холидия” клуби расмий вакили Жума Ал Маҳмид билан суҳбатлашди.

— Қуръа ҳақида нима дея оласиз?

— Авваламбор Малайзиядаги қуръа маросимида бўлиб турганимдан мамнунман. Шу билан бирга ташкилотчиларга раҳмат айтаман. Қуръага келадиган бўлсак, адолатли бўлди. Гуруҳда барча жамоалар тенг кучга эга. Кўп жамоалар яхши тайёргарликка эга. Чунки улар шу босқичга етиб келишган. Умид қиламанки, яхши футбол кўрамиз.

— Бунгача «Андижон» клуби ҳақида нималарни биласиз?

— Ўзбекистон футболи ҳақида гапирганда кўп баҳрайнликлар бу борада турли хил хотираларга эга. Айниқса, 2004 йилги Осиё Кубогини айтиш мумкин. Ўзбекистон термасини ютиб ярим финалга чиққанмиз. Шунингдек, Ўзбекистон ажойиб мамлакат, меҳмондўстлиги билан ҳам танилган. Шунинг учун Худо хоҳласа, Ўзбекистонда бўлиш жуда ёқимли. Қолаверса, Ўзбекистон клублари ҳақида кўпроқ билиб борамиз.

— Қуръада сиз ўйлаган рақиблар дуч келдими?

— Тўғрисини айтганда, мен бирорта жамоа номини топиш ҳақида ўйламагандим. Шунчаки, қуръадан баҳраманд бўлишни ўйладим. Чунки бу тадбирда бир-биримиз ҳақимизда кўпроқ ўрганамиз.