"Аяччо" банкротлик тўғрисида ариза топширди.
Аввалроқ Назорат ва бошқарув миллий йўналиши (DNCG) клубни профессионал мақомидан маҳрум қилгани ва уни Лига 2дан чиқариб юборгани ҳақида хабар берилганди. Маълум бўлишича, "Аяччо" Лига 2дан чиқариб юборилмаслиги учун 15 миллион еврога сохта банк кафолати берганликда гумон қилинган.
SAS Athlétic Club Ajaccien ACA Footbal профессионал тузилмаси "Аяччо" тижорат судига банкротлик тўғрисида ариза бериш орқали тугатиш тартибини расман бошлади.
"Энди ҳаммаси адвокатлар қўлида", деди клубнинг собиқ ходимларидан бири.
Клубнинг тугатилиши 180 га яқин иш ўринларини йўқотишига олиб келиши мумкин. Май ойида Лига 2да энг яхши академия деб топилган ўқув маркази ҳам ёпилади.
Клубнинг қарзи камида 13 миллион еврога баҳоланмоқда, бироқ яқин ҳафталарда бу маблағ бундан ҳам кўпроқ бўлиши мумкин. Сўнгги ойларда инвестор топишга уринишлар муваффақиятли бўлмади.
Раҳбарияти истеъфога чиқишга тайёрланаётган АСА ассоциацияси бошқарувни ўз қўлига олиш ниятида ва бешинчи бўлимга ариза топширишга умид қилмоқда. Аммо бунинг учун клуб федерал DNCGнинг яқинда қабул қилинган миллий мусобақаларда иштирок этишни тақиқлаган қарори устидан шикоят қилиши керак.
17 август, якшанба куни "Аяччо" мухлислари ассоциацияси клубга ёрдам бериш учун онлайн коллекция очди ва 24 соат ичида 12 минг евродан ортиқ маблағ йиғишга муваффақ бўлди.
