"Милан" ҳужумчиси Ноа Окафор катта эҳтимол билан фаолиятини Англия Премьер-лигасида давом эттиради. 25 ёшли футболчи "Лидс"га ўтиш арафасида турибди, дея хабар бермоқда инсайдер Фабрицио Романо. "Товуслар" "россонерилар" билан трансфер шартларини деярли келишиб олишган. Агар ҳаммаси режа бўйича кетса, битим бир сутка ичида ёпилади.
Аввалроқ, "Лидс" Ноа Окафор учун 20 млн евро тўлашга тайёрлиги ҳақида хабарлар тарқалган эди. Футболчининг Transfermarkt сайтидаги нархи - 13 млн.
Швейцариялик футболчи 2023 йил ёзидан бери "Милан" шарафини ҳимоя қилиб келмоқда - ўшанда у Австриянинг "Ред Булл Зальцбург" клубидан 15,5 миллион еврога сотиб олинган эди. Ўтган мавсумнинг иккинчи ярмини форвард "Наполи"да ўтказди ва у билан А Серия ғолибига айланди.
