"Milan" hujumchisi Noa Okafor katta ehtimol bilan faoliyatini Angliya Premyer-ligasida davom ettiradi. 25 yoshli futbolchi "Lids"ga o‘tish arafasida turibdi, deya xabar bermoqda insayder Fabrisio Romano. "Tovuslar" "rossonerilar" bilan transfer shartlarini deyarli kelishib olishgan. Agar hammasi reja bo‘yicha ketsa, bitim bir sutka ichida yopiladi.
Avvalroq, "Lids" Noa Okafor uchun 20 mln yevro to‘lashga tayyorligi haqida xabarlar tarqalgan edi. Futbolchining Transfermarkt saytidagi narxi - 13 mln.
Shveysariyalik futbolchi 2023 yil yozidan beri "Milan" sharafini himoya qilib kelmoqda - o‘shanda u Avstriyaning "Red Bull Zalsburg" klubidan 15,5 million yevroga sotib olingan edi. O‘tgan mavsumning ikkinchi yarmini forvard "Napoli"da o‘tkazdi va u bilan A Seriya g‘olibiga aylandi.
