"Барселона" ҳужумчиси Маркус Рэшфорд Ла Лигада АПЛга қараганда рақиблар ҳимояси зичроқ бўлиши унинг учун муаммо бўладими, деган саволга жавоб берди.
"Менимча, ҳа. Испанияда бўш жой камроқ. Аммо "Мальорка" билан ўйин камдан-кам учрайдиган тасодиф бўлди, деб ўйлайман, чунки уларда икки ўйинчи майдондан четлатилди ва улар бутун жамоа бўлиб ҳимояландилар. Аммо барча ўйинлар ҳам бундай бўлмайди," - дея Рэшфорднинг сўзларини келтиради Barca Universal.
"Барселона" Рэшфордни жорий трансфер ойнасида "Манчестер Юнайтед"дан ижарага олди. Футболчининг дебюти Испания чемпионатининг биринчи турида "Мальорка"га қарши ўйинда (3:0) бўлиб ўтди, у ерда вингер 69-дақиқада захирадан майдонга тушди.
