ФИФА бугун терма жамоаларнинг янги рейтингини эълон қилди. Ўзбекистон терма жамоаси аввалги ойдаги 58-ўрнини сақлаб қолди.

Хабарингиз бор, терма жамоамиз ЖЧ-2014 саралашининг Жанубий Кореяга қарши баҳсида мағлубиятга учраган бўлса, Қатар устидан зафар қучди. Хитой билан ўртоқлик ўйини ҳам жамоамизга маълум очколарни келтирди. Натижада терма жамоамиз ҳисобидаги очколар сони 13 очкога ошди.

ЖЧ йўлланмасини қўлга киритган Эрон бирданига 15 поғона юқорига кўтарилиб, 52-ўринга чиқиб олди. Натижада Ўзбекистоннинг Осиё қитъасида 5-ўринга тушиб қолди. Япония 37 (5та ўрин пастлаган), Австралия 40 (+7) ва Жанубий Корея (-3) терма жамоаси 43-ўринни эгаллаб туришибди. Плей-оффдаги рақибимиз Иордания эса 1 поғона пастлаб, 76-ўринга жойлашди.

Осиё кубоги-2015 саралаш гуруҳидаги рақибларимиз қуйидаги ўринларда қайд этилишган: БАА — 85 (+2), Вьетнам — 145 (-12) ва Гонконг — 148 (-1).

Рейтингни Испания терма жамоаси бошқариб турибди. Испанлар иккинчи ўриндаги Германияни 259 баллга ортда қолдиришган. Колумбия эса бирданига 4 поғона кўтарилиб, 3-ўринга чиқиб олди. Бразилия эса 13-ўрин "сакраб", 9-ўринга чиқиб олди. Россия терма жамоаси эса 6 поғона пастлади ва 17-ўринни банд этди.

Рейтингнинг тўлиқ кўриниши билан ФИФА сайтида танишиб олишингиз мумкин.