Миланнинг "Интер" клуби ҳужумчиси Лаутаро Мартинес А Серия 1-туридан ўрин олган "Торино"га (5:0) қарши ўйиндан сўнг ўз фикрлари билан ўртоқлашди.
"Нерадзуррилар" сардори гол ва ассистни ўз ҳисобига ёздириб қўйган бўлса, 79-дақиқада унинг ўрнига янги футболчи Анди Диуф майдонга тушди. Учрашув жамоа учун бош мураббий Кристиан Киву қўл остида чемпионат доирасидаги биринчи ўйин бўлди.
"Ажойиб ҳиссиётлар. Мураббий бизга кўп ёрдам беради, қаттиқ ишлашга ундайди. Бугун биз тўпни йўқотгандан сўнг дарҳол қайтариш иштиёқида ёнаётган жамоани кўрдик - айнан шундай кайфият билан биз Киву даврида ўйнаймиз. Биринчи ўйин ажойиб чиқди," - дея Лаутаронинг сўзларини келтиради "Интер" матбуот хизмати.
