"Манчестер Юнайтед" янги бош мураббийи Дэвид Мойес уни бу лавозимда расман таништириш учун уюштирилган матбуот анжуманида иштирок этди. У ўз сўзида жамоа ҳужумчиси Уэйн Руни клубда қолишини таъкидлаб ўтди. Бу ҳақда Sky Sports шундай ёзади.

"Уэйн Руни сотилмайди. Ўйинчиларимиз "Манчестер Юнайтед" аъзолари ва шундай бўлиб қоладилар. Бир неча маротаба учрашувлар ўтказдик, ва шунингдек машғулотларда ҳам Уэйн ўзини яхши томондан кўрсатди. У таътилдан ажойиб формада қайтиб келди ва мен у билан ишлашни сабрсизлик билан кутмоқдаман", деди Мойес.

Бош мураббий, шунингдек, журналистларнинг "Рунининг ўзи "Олд Траффорд"да қолишни хохлаяптими ўзи", қабилидаги саволига ҳам жавоб беришига тўғри келди. Аммо мураббий, очиғини айтганда, гапни айлантирди:

"У билан бир неча маротаба гаплашиб олдик. Унга "Уэйн, ўтган ишга саловот, энди бирга ишлаймиз", деб айтдим. Ва ҳозир унинг кўзлари ёниб турганини кўряпман".